Алматы қаласы бойынша Қазақстан мұсылмандары діни басқармасының (ҚМДБ) ғимаратында Al Hilal ислам банкі мен ҚМДБ өкілдері кездесіп, елімізде бір ай бұрын іске қосылған алғашқы исламдық ипотеканы талқылады.

Кездесу барысында Al Hilal ислам банкінің Исламдық қаржыландыру қағидаларын үйлестіру және бақылау бөлімінің директоры Махмадрузи Шоев ислам ипотекасының құрылымы, Мурабаха әдісі арқылы жүзеге асыру процедуралары туралы айта келе, ипотеканың Шариғат қағидаларына сәйкес екенін атап өтті.

«Ислам ипотекасы Мурабаха әдісі арқылы беріледі, яғни Банк клиенттен клиент таңдаған үйді сатып алуы туралы міндеттемесін алады да, ары қарай сол үйді сатып алады. Банк үйдің толық меншік иесі болғаннан кейін ғана, үйдің бастапқы құнына үстеме баға және төлемақы мерзімін ұзарту арқылы Мурабаха келісім шартын жасасып клиентке сатады» - деді Исламдық қаржыландыру қағидаларын үйлестіру және бақылау бөлімінің директоры Махмадрузи Шоев.

Кездесуге ҚМДБ «Шариғат және Пәтуа» бөлімінің басшысы Сансызбай Құрбанұлы, ҚМДБ дін істері және талдау бөлімінің басшысы Нұрбек Есмағанбет қатысты, сонымен қатар Қазақстан мұсылмандары діни басқармасының өкілдері ислам ипотекасы туралы ғана емес, жалпы ислам банкингі мен жұмыс қағидалары туралы сұрақ қойды.

«Алғашқы ислам ипотекасының іске қосылуы мешіттерге келушілердің қызығушылығын оятты, біз үшін осы мәселені анықтап, банктің ипотекалық қаржыландыру саласындағы қызметін түсіну маңызды. Кездесу барысында ипотеканың Шариғат заңдары мен қағидаларын қатаң сақтайтыны туралы егжей-тегжейлі ақпарат алдық» - деді ҚМДБ «Шариғат және Пәтуа» бөлімінің басшысы Сансызбай Құрбанұлы.