Al Hilal Ислам Банкі АҚ қазақстандық жеке тұлғаларға қызмет көрсету нарығында өзінің алғашқы, шариғат қағидаттары мен нормаларына сай келетін карталарын ұсынды.
Исламдық картада тыйым салынған пайыз риба- жоқ, яғни картадағы ақша қалдығына пайыздық сыйақы есептеуге тыйым салынған. Бұл карталардың тағы бір ерекшелігі – клиенттер шариғат бойынша тыйым салынған тауарлар мен қызметтердің ақысын төлей алмайды. Мысалы, картаны ойын-сауық және көңіл көтеру орындарында, казиноларда, букмекерлік кеңселерде, темекі және алкоголь өнімдерін сатумен айналысатын дүкендерде қолдануға болмайды.
Қазіргі уақытта карталарды Астана, Алматы және Шымкент қалаларының тұрғындары үшін шығаруға болады. Жақында географиясын кеңейтіп, оларды Қазақстанның өзге өңірлерінде де қолжетімді ету жоспарланып отыр.
Картаны ұстаушылар Қазақстанда және шетелде тауарлар мен қызметтердің ақысын төлеп, әрбір сатып алу үшін 0,5% бастап 1% дейін кэшбэк ала алады. Сонымен бірге, интернет арқылы да сатып алулар, картадан картаға ақша аудару, салықтар мен айыппұлдарды, коммуналдық және өзге қызметтерді онлайн төлеу де қарастырылған. Шотты банктің филиалдарындағы касса арқылы, «Қазкоммерцбанк» АҚ банкоматтарының желісі арқылы немесе картадан картаға ақша аудару арқылы толықтыруға болады. Картаны басқару мейлінше ыңғайлы болу үшін клиенттерге интернет-банкинг қызметі қолжетімді болады.
Жақында ғана Al Hilal жеке тұлғалар үшін өз есігін айқара ашты. Дебеттік карталарды іске қосу біздің қызметтеріміздің даму жолындағы заңды құбылыс болып отыр. Бұл клиенттерге жаңа өнімді пайдалану мүмкіндігін беріп қана қоймай, банктің болашақтағы қызметтерінің негізін қалайды. Cонымен қатар, исламдық карта шариғат нормаларын ұстанатын клиенттер үшін көбірек мүмкіндіктер береді, - дейді Al Hilal Ислам Банкі АҚ Басқарма төрағасы Гордон Хаскинс.
Банктің дебеттік карталары Master Card Gold және Master Card Platinum санаттарында шығарылатынын айта кету керек. Келесі жылдың басында банк өзінің алғашқы несие карталарын шығаруды жоспарлап отыр.
